Shuruat

Uss khamoshi mein mili thi ek raah,

Thi voh meri, aur tumhari, par nahi thi hamari,

Chal pade the saath, par bikharna jaruri hai,

Firse judne ke liye tutna jaruri hai,

Kuch milne ke liye uska khona jaruri hai,

Raatein beet gayi, aur khatam ho gayi saari baatein,

Waqt badal gaya, aur badal gaye hum, par nahi badli voh yaadein,

Mile apne raste kai baar, par jude nai hai fir kabhi,

Manzil ka nahi hai pata, magar chalte rehna hai jaruri,

Bichad gaye hum par nahi gaye duur,

Aaj hai ek nayi shuruat, ek naya safar,

Vohi choda hua haath liye, chal pade hai firse,

Mili hai firse hamari raahein, na jaane kab tak,

Hai ek nayi soch, ek naya jazba, ek nayi taakat,

Ek nayi shuruat ke liye, kuch khatam hona bhi jaruri hai.

Ek Adhuri Kahani

Nikal pade sapno ke piche,

Banane khud ki raah iss zindagi ke daur mein,

Dekha na kabhi chehra tera,

Par palken jab bandh hui tab thi tum,

Kat gaya sama uss tanhayee mein,

Samay ne bhi lagayi vohi zindagi ki daud,

Thaam liya haath kabhi, aur kabhi unhi haathon ko thaam liya,

Choot gaye saath kayi, kuchal gaye waqt ke paigaam mein,

Unn aasuo ko ponchh kar chalte rahe akele,

Gham ke aanchal mein lipat ke soye chandni ke tale,

Jala diya tha chirag uss andhere se duur rehne,

Par vohi roshni nighal gayi voh khushi,

Yaadein jab chaa gayi har lamhein mein,

Chehra voh mehka aankhon ke saamne,

Khilkhilaya yeh dil, roya voh khudke liye, tumhare liye,

Khinch kar le aaya tumhare dar pe,

Khatam ho gayi har kahani jisse lekar chale the,

Reh gayi bass tum, ek adhuri kahani.

Aankhon Mein

Inn andekhi raaho pe mil gayi thi nazren,

Uss chup si aandhi mein bhi ho gayi hazaron baatein,

Nigaho mein behti hui dil ki awaazein,

Uss udasi mein ubhar kar bhi muskurahat si laayi,

Andhero mein faasle bayaan ho gaye,

Tere chehre ki ronak se ek nayi subeh ho gayi,

Raasta chalta gaya, kabhi upar, kabhi niche,

Lete gaya voh apne mod par tha ek saath,

Mudna nahi tha har pal se, bhulna nahi tha kisi lamhe ko,

Bass karna tha paar har toofan ko,

Hasna tha, khilkhilana tha, jeena tha zindagi ko,

Raat ke uss daravne sapne mein bhi chaa gayi ek umang,

Haathon ki lakire jab keh gayi apni daastan,

Shabd na bayan kar sake voh kahani,

Dil hai sehma sa, mann hai chupa sa,

Aur bass aankhon mein hi ho jaati hai har baat.

Talaash

Iss khamoshi ki leheron mein pighal raha hu mein,

Beh raha hun aaj, nahi hai pata manzil ka,

Tanhayee main beete unn lamhon ko yaad karke muskurata hu mein,

Ek khushi thi uss behoshi main,

Par thi saath ek bechaini jo uss waqt main dariya bana rahi thi,

Lehraati zindagi ki parchayi main sehem raha hu mein,

Raah ka nahi hai pata iss toofan main,

Boondon mein jhalak raha hun,

Par nahi dikh raha hu khudko,

Khoya hai raasta aur khoya hun mein,

Raah hai kayi nazron main, par hai pare iss pal se,

Samay ka nahi hai pata, kyunki dhund raha hu khudko mein.

Ek Anokhi Muskaan

Ek lamha mayusi ka tha voh,

Jisne di hai aaj badi si muskaan,

Ubhar kar saaye se takraye the hum,

Chal pade iss zindagi ke daur mein haath dhare,

Shabd nahi hai uss pal ko dauhrane ke liye,

Par saji hai kahani unn unkahe labzon ke bich,

Chupi hai aaj ki muskurahat mein,

Beh rahi hai voh aaj bhi uss din ki yaadon mein,

Anjaan the hum par naadan nahi,

Khoye hue the hum par duur nahi,

Faasle mite aur ghum bhi,

Ban gaya tha ek saaya jo chalta hai aaj bhi saath,

Saval hai kai par javab hai nahi,

Uljhi hui hai dor yeh, hai chupi inn aankhon se,

Samajh se pare, iss soch se milon duur,

Par chaa jaati hai khushi,

Aa jaati hai labon pe muskaan tumhare khayal se hi,

Aur mann yeh keh deta hai,

Kuch chize hoti hi hai anokhi, shabdo se duur, aur samajh se bhi,

Par nahi hai iss baat se shikwa kyunki paas ho tum.